डडेल्धुरा । गन्यापधुरा गाउँपालिका-५ कोरालमा भलिबल प्रतियोगिता सुरू भएको छ । कोरालमा बिहिबार देखि खुला पुरुष भलिबल प्रतियोगिता सुरु भएको हो ।
दुर्गा भगवती युवा क्लबको आयोजनामा सुरु भएको प्रतियोगिताको एक कार्यक्रमका बीच नेपाली काङ्ग्रेस डडेल्धुराका सचिव एवं भूमि आयोग डडेल्धुराका अध्यक्ष शेरबहादुर भण्डारीले उद्घाटन गरेका थिए ।
आयोजक दुर्गा भगवती युवा क्लबका अध्यक्ष नरेन्द्र भाटका अनुसार २६ गतेसम्म हुने प्रतियोगिताका विजेतालाई ४५ हजार, दोस्रो हुने टिमलाई २५ हजार र तेस्रो हुने टिमलाई १५ हजार नगद पुरस्कार राखिएको छ । प्रतियोगितामा १७ टिमको सहभागिता रहेको क्लबका अध्यक्ष भाटले बताए ।
उद्घाटन कार्यक्रममा गन्यापधुरा गाउँपालिका वडा नं.-५ अध्यक्ष चन्द्रप्रसाद रोस्यारा, वडा नं.-३ का अध्यक्ष चक्रबहादुर देउवा, शिखर नगरपालिका वडा नं.-१० का काङ्ग्रेस सभापति दुर्गाप्रसाद रोस्यारा लगायतको सहभागिता रहेको थियो ।
२०५२ सालमा स्थापना भएको क्लबले प्रत्येक वर्ष तिहारको अवसरमा भलिबल प्रतियोगिता आयोजना गर्दै आएको छ ।
