डडेल्धुरा । जेसिजले सात दिने बिबिध कार्यक्रमको आयोजना गरि मनाउन लागेको जेसिज सप्ताहको डडेल्धुरामा आईतबार रक्तदान गरि शुभारम्भ भएको छ । नेपाल रेडक्रस सोसाईटि डडेल्धुराले सञ्चालनमा ल्याएको ब्लड बैंकमा रक्तदान गरेको छ ।
डडेल्धुरा जेसिज वर्ष २०२३ का अध्यक्ष जेसि भोजराज अवस्थीका अनुसार दुई पिन्ट रगत ब्लड बैंकमा संकलन भएको छ । करिब १२ जना आवश्यक परेको खण्डमा रक्तदान गर्न तयार रहेका छन ।
जेसिज सप्ताहमा कात्तिक १६ गते देखि ५१ हजार १११ रुपियाँ नगद धन राशि पुरस्कार भएको जिल्ला स्तरिय खुल्ला भलिबल प्रतियोगिताको आयोजना गरिने छ ।
भलिबल प्रतियोगितामा द्धितिय पुरस्कार २५ हजार १११ र तृतिय पुरस्कार १५ हजार १११ रुपियाँ नगद सहित ट्रफि, प्रमाण पत्र राखिएको छ ।
यस्तै कात्तिक १३ गते दिउसो बसपार्कमा म्युजिकल चेयर, घैटो फुटाउने, १४ गते गन्यापधुरामा निःशुल्क आँखा जाँच, औषधी वितरण, १५ गते अमरगढी नगपालिका २ मा निःशुल्क दन्त स्वास्थ्य सल्लाह, उपचार तथा औषधी वितरण, १६-१८ सम्म भलिबल प्रतियोगिताको आयोजना गरिने उनले जानकारी दिए ।
भलिबल प्रतियोगिता अमरगढी नगरपालिका ८ हवाई ग्राउण्ड डडेल्धुरा मेडिकल कलेजको भवन निर्माण स्थल नजिकको मैदानमा खेलाईने छ ।
